وجهة نظر للسوق ورأي لا أكثر
كل شخص جرب يفتح على شارت عملة ويحكي لو واحد اشترى هون بألف دولار بكون حاليا معه مش عارف كم الف او كم مليون ، لكن كم عدد الأشخاص اللي ممكن فعلا دخلوا من هذا المكان وطلعوا بالضبط عند هذا المكان ؟
الجواب اما ولا شخص او عدد اشخاص محدودين جداً ، شو السبب ؟
السبب برجع لعدة أشياء :
أولاً نادراً ما يقدر الشخص يحدد القمة والقاع بدقة متناهية .
ثانياً والأهم ما في شخص بقدر يسيطر على مشاعره عند رؤيته لارباح ضخمة من مبالغ بسيطة ويقاوم شعور انه لو نزل السوق وتبخرت هاي الارباح شو راح اعمل ؟ فبكل بساطة ببيع .
ثالثاً السوق غير متوقع بشكل كبير .
لكن ممكن عالأقل تشتري وتعزز وتجمع لحد ما توصل الى سعر دخول جيد ومناسب وبهذه الحالة بتكون قربت من الشراء بالقاع ،الآن نروح للبيع انت أمامك عدة استراتيجيات منها البيع على مراحل واستراتيجية جيدة جداً، اما بالمرحلة الحالية من المهم تعرف وين مكانك بالسوق حاليا حتى تعرف تدير رأس مالك بشكل صحيح وتحقق أكبر ربح ممكن بهذه الفترة الذهبية اللي راح تعض اصابعك ندم اذا راحت وانت على ربح بسيط او حتى في ناس للاسف على خسارة .
من وجهة نظري السوق حاليا وصل الى مكان جيد نوعاً ما والمرحلة القادمة هي انتقال السيولة الى العملات البديلة بقيادة الايثيريوم ، شو يعني انتقال السيولة؟
الأشخاص اللي بملكوا رؤوس أموال كبيرة وحيتان السوق والقدماء فيه هم مستثمرين بيتكوين وهالاشخاص لا يمكن يبيعوا البيتكوين أصلا لانهم بعتبروه الأصل الآمن لمدخراتهم ومؤمنين فيه وعندهم قناعة إنه ضخامة القيمة السوقية للعملة بتحد من التقلبات العالية بالسعر يعني عملة قيمتها السوقية بالمليارات لو باع فلان او علان صعب يكون في تأثير كبير بالسعر عالعملة بالتالي ما راح يكون في هالتغير برصيده بينما المستثمر في عملة بقيمة سوقية بسيطة ممكن شخص واحد او أحد أعضاء الفريق يبيع نصف كميته ويعمل تغير كبير بالسعر ، طيب هالأشخاص كيف بحققوا الربح ؟
بتم تحقيق الربح بانهم من خلال زيادة كمياتهم من البيتكوين وليس بيعها وتحويلها الى عملات مستقرة ! كيف يعني ؟
يعني على سبيل المثال حوت حاول يشتري ويعزز ويجمع وبالنهاية وصل لمتوسط دخول للبيتكوين من سعر 25 الف دولار ،ووصل سعر البيتكوين حاليا الى 88 الف شو الخطوة اللي بعملها ؟ بروح بتداول البيتكوين أمام العملات البديلة وليس أما العملات المستقرة يعني ما ببيع البيتكوين عند هذا السعر وبشتري USDT لانه هيك بكون طلع من السوق والحيتان والمستثمرين عمرهم ما بطلعوا من السوق ، بكل بساطة بروح ببيع البيتكوين امام عملة ال Aptos مثلا اللي صارت في قاع أصلاً أمام البيتكوين بسبب ارتفاع البيتكوين وعدم الاقبال على شراء هذه العملة ، يعني عند وصول البيتكوين الى قمة القمة ستكون العملة في قاع القاع ، فبروح بشتري APTOS مثلا بالبيتكوين بالتالي هالعملة بترتفع ارتفاع جنوني وبتحقق أضعاف وعند وصولها الى القمة بكل بساطة برجع ببيع APTOS أمام البيتكوين بكون بهاي الحركة ضاعف كمياته من البيتكوين من خلال تداولها مع أزواج العملات البديلة .
وعشان أقرب الصورة أكثر مثلا اشترى بحبة بيتكوين واحدة 10 حبات من عملة X او شو ما بدك سميها وارتفعت عملة X وحققت 5 أضعاف أمام البيتكوين راح رجع باعها أمام نفس العملة أكيد وقتها راح يحصل على 5 حبات بيتكوين لانه ارتفعت 5 أضعاف أمامه ، وهيك بكون حقق ربح من الصعود الأول لسعر الأصل اللي بملكه وبعدها راح ضاعف كمياته من هالأصل من خلال باقي العملات ، وهدول الأشخاص او الحيتان هذه هي المرحلة اللي بنتظروها وبتهمهم وفيها أكبر ربح ممكن يحققوه ولو بعدها رجع البيتكوين لسعر الاربعين وحتى الثلاثين بكونوا هم لسة على ربح كبير وكبير جداً كمان لانهم ربحوا بدل المرة مرات ، طيب احنا شو بنستفيد من هالكلام ؟
كونه رؤوس أموالنا في الغالب بتتراوح ما بين الالف والعشرة الاف ما بنشتغل على ازواج البيتكوين بنشتغل على العملات المستقرة وبنشتري العملات مباشرة وحتى لما نبيعها بنبيعها مقابل هاي العملات بنروح بنحط امانا شارت استحواذ البيتكوين وشارت العملة أمام البيتكوين وبنحدد الأهداف بناءا على شارت عملتنا أمام البيتكوين وبنعلق أوامر البيع بناءا على إدارة رأس مالك واستراتيجيتك الخاصة ، ولا تبيع أبدا قبل تحقيق الأهداف وصدقني بالنهاية كل عملة راح تنحلب من هالحيتان لزيادة كمياتهم بالتالي راح تحقق اهدافها معك وتبيع ولا تخرج من السوق بالاوقات الحالية لانه راح تستغرب والكل قاعد بستنى التصحيحات المبيرة بعد هالصعود الكبير انه البيتكوين صحح بس العملات قاعدة بتطلع وكل يوم بتلاقي عملات قاعدة بتعمل اكسات وبتنزل وانت مش فاهم شو اللي قاعد بصير وفي اشخاص بصير يطلع من العملو اللي لسة ما وصلها الدور وببدا يلحق الشموع الصاعدة بالعملات الثانية بروح الحوت بصرف عليه وبستغل الفومو والجدد في السوق ، لهيك درست عملتك مشروعها اعدادها فريقها خلص امسك سعر الدخول وحدد الأهداف وانتظر وانت ساكت وما راح تطلع خسران بس النط هون وهون راح يدمر محفظتك ويمحيها ويخلص البول ماركت وانت قاعد بتتفرج وبتتحسر وبتحكي ياليت اللي جرى ما صار او تروح تحكي الكريبتو نصب او فلان اعطاني نصيحة وخسرني ،افهم السوق على اي اساس ماشي وأصبر وطول بالك وراح تجمع ارباحك وراقب الاستحواذ لانه هو كلمة السر للعملات ولا تنغر بصعود عملات ثانية وعملتك مكانها لانه بكل بساطة لسة ما اجاها الدور وممكن تحاول تتذاكى وتستنى عملة عملت اكسات وسعرها نزل تحكي يلا بدخلها بكرة بترجع تطلع وسلملي على بكرة الله اعلم متى ييجي وراح تزهق وتحجز راس مالك وبالاخر تطلع بخسارة .
كلام طويل وكثير لكن ممكن يكون مفيد لو لشخص واحد عالاقل وسلامتكم وبالتوفيق جميعا وارباح مباركة ان شاءالله 🌹🌹
#binance #marketCap $btc
